“Rwy’n pryderu am y pwyslais cyfyngedig a roddir ar newid hinsawdd a natur yn Rhaglen Lywodraethu newydd Llywodraeth Cymru.

Bydd y camau hinsawdd y mae angen inni eu cymryd hefyd yn ein gwneud yn iachach, yn fwy llewyrchus ac yn fwy diogel ac, er bod cynllun Llywodraeth Cymru yn cynnwys nifer o uchelgeisiau i’w croesawu, nid yw’n glir, naill ai yn y Rhaglen Lywodraethu nac yn yr Amcanion Llesiant, sut maent yn cysylltu â nodau llesiant hirdymor Cymru, na sut y byddant yn gweithio gyda’i gilydd i fynd i’r afael â’n heriau cydgysylltiedig.

Ni ellir gwahanu gwella iechyd, cryfhau cymunedau, tyfu ein heconomi a lleihau anghydraddoldeb oddi wrth adfer natur ac ymateb i’r argyfwng hinsawdd, sy’n gwneud bywyd yn anoddach i bob un ohonom ym mhob ffordd, boed eich bod yn cael trafferth talu i wresogi’ch cartref neu’n anfon eich plentyn i’r ysgol mewn ardal lle mae ansawdd yr aer yn wael.

Rwy’n croesawu’r ymrwymiad o’r newydd i adolygu Deddf Llesiant Cenedlaethau’r Dyfodol, ar sail fy argymhelliad, ac edrychaf ymlaen at gyfrannu fel y gallwn gryfhau’r gyfraith hon a sicrhau nad ydym yn colli unrhyw gyfle i wella bywydau pobl yng Nghymru.

Mae gweithredu ar yr hinsawdd yn gwella bywydau pobl, ac nid problem yfory yw’r argyfwng hinsawdd mwyach; mae angen i’r ymateb fod yn hollgynhwysol.”

Derek Walker, Comisiynydd Cenedlaethau’r Dyfodol Cymru