O 19 Medi 2026, mae’n ofynnol i Gomisiynydd Cenedlaethau’r Dyfodol Cymru gydymffurfio â Safonau’r Gymraeg. Mae’r Safonau’n nodi’n glir ein rhwymedigaethau i ddarparu ein gwasanaethau drwy gyfrwng y Gymraeg.  

Mae’r dyletswyddau sy’n deillio o’r safonau yn golygu na ddylai sefydliadau drin y Gymraeg yn llai ffafriol na’r Saesneg, ac y dylent hefyd hyrwyddo a hwyluso’r defnydd o’r Gymraeg, gan ei gwneud yn haws i bobl ei defnyddio yn eu bywydau bob dydd. Ein nod yw galluogi pawb sy’n derbyn neu’n defnyddio ein gwasanaethau i wneud hynny drwy gyfrwng y Gymraeg neu’r Saesneg, ac annog eraill i ddefnyddio a hyrwyddo’r Gymraeg ar draws y sector cyhoeddus ehangach.

Pan fyddwch yn derbyn gwasanaeth gan sefydliad cyhoeddus yng Nghymru, dylech allu derbyn eich gohebiaeth yn Gymraeg. Wrth ffonio sefydliad, dylai’r sawl sy’n ateb eich galwad wneud hynny’n ddwyieithog. Os ydych wedi cyflwyno ymholiad neu gŵyn i sefydliad yn Gymraeg, ni ddylai eich dewis iaith arwain at unrhyw oedi. Dylai’r sefydliad hefyd weithredu polisïau a chadw cofnodion yn Gymraeg. I grynhoi, mae’r safonau’n:

• ei gwneud yn glir i sefydliadau beth yw eu dyletswyddau mewn perthynas â’r Gymraeg 

• ei gwneud yn gliriach i siaradwyr Cymraeg pa wasanaethau y gallant ddisgwyl eu derbyn yn Gymraeg 

• gwneud gwasanaethau Cymraeg yn fwy cadarn a chyson, a gwella eu hansawdd. 

Rydym yn edrych ymlaen at weithio gydag eraill i sicrhau ein bod yn bodloni’r safonau ac at fynd ati’n rhagweithiol i archwilio ffyrdd newydd o gryfhau’r defnydd o’r Gymraeg yn fewnol ac ar draws Cymru. Gyda’n gilydd, gallwn gyfrannu at yr uchelgais o gyrraedd miliwn o siaradwyr Cymraeg a chefnogi twf parhaus y Gymraeg a diwylliant Cymru, yn unol â Deddf Llesiant Cenedlaethau’r Dyfodol. Mae Diwylliant a’r Gymraeg yn genhadaeth benodol i Gomisiynydd Cenedlaethau’r Dyfodol Cymru.

Dysgwch ragor am ein gwaith yma.