Rydym yn gwneud llesiant yn genhadaeth ganolog ein gweithgareddau yma yng Nghymru, fel bod ein bywydau’n gwella heddiw ac yn y dyfodol.

Er gwaethaf y cynnydd, nid ydym yn gwneud popeth o fewn ein gallu i wella llesiant cenedlaethau’r presennol a’r dyfodol. Rhaid i ni sicrhau bod cyflymder a graddfa’r her yn gyfartal. Byddwn yn cefnogi cyrff cyhoeddus i ddefnyddio’r Ddeddf i greu’r newid hwn.

Adroddiad Cenedlaethaur Dyfodol 2025: Argymhellion

1. Dylai Llywodraeth Cymru ymrwymo i adolygiad ôl-ddeddfwriaethol o Ddeddf Llesiant Cenedlaethau’r Dyfodol i gryfhau ei heffaith ac i baratoi ar gyfer diweddariadau i Nodau Datblygu Cynaliadwy’r Cenhedloedd Unedig yn 2030. Dylai’r adolygiad hwn gynnwys deialog cyhoeddus i ymgysylltu â phobl ledled Cymru wrth lunio dyfodol polisi llesiant.
2. Rhaid i Lywodraeth Cymru asesu a symleiddio strwythurau partneriaeth er mwyn lleihau cymhlethdod a gwella cydgysylltu ledled Cymru.
3. Dylai Llywodraeth Cymru sicrhau mai’r Prif Weinidog sy’n parhau i fod yn gyfrifol am weithredu Deddf Llesiant Cenedlaethau’r Dyfodol.
4. Rhaid i gyrff cyhoeddus sicrhau bod staff sy’n gyfrifol am feysydd newid corfforaethol yn deall Deddf Llesiant Cenedlaethau’r Dyfodol mewn ffordd sy’n gwella ansawdd a chysondeb gweithredu drwy hyfforddiant gorfodol a datblygu gallu.
5. Rhaid i gyrff cyhoeddus ymgysylltu’n fwy â’r cyhoedd er mwyn meithrin ymddiriedaeth, cryfhau consensws, a phontio’r bwlch rhwng llunio polisïau a dinasyddion.

Yr hyn y mae cyrff cyhoeddus wedi’i ddweud wrthym:

• Mae cyrff cyhoeddus yn gwerthfawrogi cyfranogiad ond yn cydnabod yr angen i fynd ymhellach. Mae pob un wedi mabwysiadu neu gefnogi ein hargymhellion i gryfhau ymgysylltiad, gydag enghreifftiau o arfer da fel Siarad Caerdydd a fforymau cleifion. Fodd bynnag, mae cyfranogiad yn dal i gael ei arwain yn aml ar delerau sefydliadol, yn hytrach na chael ei ymgorffori’n llawn ar draws sefydliadau a’i gyflwyno trwy ddull mwy cydweithredol.
• Mae bylchau o hyd yn nealltwriaeth staff o’r Ddeddf. Er bod llawer o sefydliadau’n darparu hyfforddiant sefydlu neu barhaus ar Ddeddf Llesiant Cenedlaethau’r Dyfodol, nid yw hyn eto’n gyson nac yn orfodol ar draws pob corff. Dywedodd y rhan fwyaf o gyrff cyhoeddus eu bod wedi mabwysiadu neu’n cefnogi ein hargymhelliad i wella mynediad at hyfforddiant

Er mwyn cryfhau dealltwriaeth, bydd Cenedlaethau’r Dyfodol Cymru yn:

• Arwain trwy esiampl trwy gyflwyno strategaeth Cymru Gall ac ehangu hyfforddiant ar ddulliau cyfranogol.
• Treialu dysgu newydd ar Ddyfodol Cyfranogol.
• Ail-lansio Egwyddorion Cyfranogiad Cyhoeddus Cymru gyda phartneriaid.
• Ehangu ein cynnig hyfforddiant ar-lein ac wyneb yn wyneb.
• Parhau i rannu offer i gefnogi gweithredu.
• Datblygu dull ‘hyfforddi’r hyfforddwr’ i gyrraedd mwy o bobl.
• Targedu cefnogaeth at swyddogaethau canolog corfforaethol, gan helpu timau i gymhwyso’r Ddeddf mewn meysydd fel caffael, rheoli asedau a chyllid.

Eisiau dysgu mwy am y Ddeddf?

Edrychwch ar ein cwrs e-ddysgu am ddim. 

Mae yna lawer o adnoddau defnyddiol eraill hygyrch ar gael. Rydym hefyd yn cynnal sesiynau hyfforddi y gallwch gofrestru ar eu cyfer yma. 

Cysylltwch â ni os na fedrwch ddod o hyd i’r hyn rydych chi’n chwilio amdano. 

Eisiau ein cefnogaeth? 

P’un ai ydych chi’n gweithio yn y sector cyhoeddus, preifat neu wirfoddol, gallwch gysylltu â ni i ddarganfod sut mae’r Ddeddf yn berthnasol i’ch rôl. E-bostiwch:  

cysylltwchani@cenedlaethaurdyfodol.cymru   

Eisiau gwybod sut mae’r Ddeddf yn cael ei gweithredu?  

Gallwch weld sut mae’r Ddeddf yn cael effaith a darllen astudiaethau achos yma. Darllenwch ein hadroddiad ar y modd y mae sefydliadau’n gweithredu argymhellion y Comisiynydd. 

Cofrestrwch ar gyfer ein cylchlythyr am fwy o wybodaeth.