Ar 29 Ebrill gwnaeth Llywodraeth Cymru ddatgan ei bod yn argyfwng ar yr Hinsawdd, yn fyr wedi cyhoeddi ei cynllun “Cymru Carbon Isel” sydd yn cynnwys 100 o bolisïau a chynigion ond dim manylion ar sut y bydd y rhain yn cael eu hariannu. Yn gynharach y mis hwn cyhoeddodd y Gweinidog uchelgais y Llywodraeth i gyflwyno targed i Gymru gael gwared yn gyfangwbl ag allyriadau carbon erbyn 2050, a tra fod hwn i’w groesawi rhaid sicrhau fod cyllid Llywodraeth Cymru yn cefnogi’r uchelgais hwn.

Bydd ymateb i’r argyfwng hinsawdd yn gofyn am lefel llawer uwch o sylw manwl a buddsoddiad; mae wyth o wledydd Ewrop yn ddiweddar wedi galw ar i 25% o gyllideb yr UE gynorthwyo gweithredu ar y newid yn yr Hinsawdd – a ddylai hyn fod yr un fath i Gymru?

Yn y Cynllun 10 pwynt i ariannu argyfwng Hinsawdd Cymru, rwyf wedi nodi deg maes ar gyfer buddsoddi lle mae angen rhoi blaenoriaeth i weithredu a’i gynyddu i gwrdd â her yr ‘argyfwng hinsawdd’. Mae’r £991 miliwn o fuddsoddiad sydd angen clustnodi yn cyllid nesaf Llywodraeth Cymru (2020-21) i ariannu trafnidiaeth cynaliadwy, buddsoddi mewn tai ac adeiladau carbon isel, ynni adnewyddadwy a datrysiadau seiliedig ar natur, yn unol ac amcangyfrif Pwyllgor y DU ar y Newid yn yr Hinsawdd (UK CCC) o £30 biliwn rhwng nawr a 2050.

Mae nifer o arbenigwyr wedi cyfrannu i’r Papur Gwyn sydd yn cyflwyno man cychwyn ar gyfer trafodaethau – gyda arbenigwyr, cyrff cyhoeddus, unigolion ac yn bwysicaf oll y Llywodraeth, i nodi pa fath o fuddsoddiad sy’n ofynnol er mwyn cyflawni ein targedau statudol.

Rydym ni’n croesawu eich adborth a’ch sylwadau ar ein cynllun – danfonwch nhw atom cysylltwchani@cenedlaethaurdyfodol.cymru