Mae’n hanfodol ein bod yn deall pryd mae pobl yn teimlo nad yw cenedlaethau’r dyfodol yn cael eu hystyried.

Mae ein cylch gwaith yn eang — mae unrhyw fater a allai effeithio ar genedlaethau’r dyfodol o fewn ein mandad. Dyna pam mae llawer o bobl yn ysgrifennu atom am ystod eang o bynciau sy’n eu poeni neu’n eu diddori, o geisiadau cynllunio penodol ac ansawdd dŵr i effaith toriadau cyllidebol ar wasanaethau cyhoeddus.

Er nad oes gan ein tîm y pŵer nac adnoddau i ymyrryd mewn achosion unigol, rydym yn ystyried gohebiaeth gyhoeddus wrth fonitro ac asesu pa mor dda mae cyrff cyhoeddus yn gweithredu Deddf Llesiant Cenedlaethau’r Dyfodol. Mae hyn yn ein helpu i nodi problemau systemig ehangach sydd angen sylw.

Sut y caiff gohebiaeth ei hystyried

Caiff pob e-bost a llythyr a dderbyniwn ei gofnodi a’i rannu gyda’r aelodau perthnasol o’r tîm i lywio eu gwaith.

Caiff y prif faterion a godir trwy ohebiaeth eu hadolygu’n rheolaidd a’u hystyried ar draws gwaith ein swyddfa, gan gynnwys:

• Monitro ac asesu – i bennu pa mor effeithiol mae cyrff cyhoeddus yn cyflawni eu hamcanion llesiant.
• Cynnwys y cyhoedd a chynllunio strategol – gan gynnwys helpu i lunio ein strategaeth saith mlynedd, Cymru Can.
• Cyngor a chefnogaeth – cefnogi cyrff cyhoeddus i fynd i’r afael â materion allweddol wrth ystyried Deddf Llesiant Cenedlaethau’r Dyfodol.

Materion Systemig

Er nad ydym yn cynnig cymorth achos unigol, os yw mater yn bodloni ein meini prawf fel problem systemig, mae ein tîm yn penderfynu pa gamau gweithredu y gallwn eu cymryd i helpu i’w datrys.

Dyma rai enghreifftiau o sut rydym wedi ymgysylltu â materion systemig a godwyd trwy ohebiaeth:

• Dylanwadu ar bolisi cenedlaethol – gweithio gyda Llywodraeth Cymru i sicrhau bod Deddf Llesiant Cenedlaethau’r Dyfodol yn cael ei adlewyrchu’n llawn ym Mholisi Cynllunio Cymru a Llwybr Newydd, strategaeth drafnidiaeth Cymru.
• Darparu cyngor a chefnogaeth – cynorthwyo cyrff cyhoeddus, megis gweithio gyda Cyfoeth Naturiol Cymru i integreiddio Deddf Llesiant Cenedlaethau’r Dyfodol yn eu gwaith trwyddedu amgylcheddol.
• Codi pryderon gyda swyddogion llywodraethol – ysgrifennu at benderfynwyr am faterion sydd o bwys i’r cyhoedd, gan gynnwys:
• Iechyd ein hafonydd a’n dyfrffyrdd.
• Effaith iechyd meddwl cau ysgolion ar blant.
• Pryderon am weithredu Canllaw Asesu Trafnidiaeth Cymru.